شهيدك يا وطني * بقلم ( حسن البدوي)
خديني يامه في حضنك ضميني
وبرموشك يامه غطيني
وفي قلبك داريني وخبيني
وامسحي دمي وارويني
ضميني يامه وداويني
ولو زعلانة سامحيني
وامسحي دمي وغطيني
وعلى حجرك يامه شيليني
وامسحي دمعي ودفيني
وعلى خدي يامه بوسيني
وضميني لصدرك وخديني
محتاج لحبك ضميني
بحبك يامه سامحيني
سامحيني يانور عيني
سامحيني يامه وداريني
دافعت يامه عن أهلي وديني
وعن حريتي وكرامتي ضربوني
ضربوني في صدري وقتلوني
وبعربية شرطة دهسوني
سامحيني يا حلوة سامحيني
ومن شهد نيلك اسقيني
قبل يامه ما تدفنيني
ولو مت يامه سامحيني
وغسليني من نيلك غسليني
واغزلي كفني من توبك وغطيني
وحطي على كفني علمك وشيليني
وفي أرض التحرير حطيني
وبين ترابك يامه واريني
واذكريني يامه ولا تنسيني
ولا تبكي يامه وسامحيني
يا قلبي يامه ونور عيني
وخلي بالك من بنتي وابني
واسقيهم حبي وحنيني
واصرخي يامه وخدي تاري
من اللي خانونكِ وقتلوني
وروحي لقبري وزوريني
واقري الفاتحة وسامحيني
وحطي وردة على قبري
واذكريني ولا تنسيني
اذكريني يامه ولا تنسيني
بقلم ( حسن البدوي)
7/2/2011 م
إهداء إلى كل شهداء الثورة الأبرار